Sámegielat hupmanterapiijai gáiddusoktavuodaid bokte

Leatgo goassege jurddašan, ahte mot jus don dárbbahivččet sámegielat hupmanterapiija, muhto dan ii leat vejolaš oažžut doppe gos don orut? Dege it leat sihkkar, gávdnojitgo obanassinge sámegielat hupmanterapeavttat geain jearrat veahki?

Eanet ahte eanet mánát bajasšaddet dán áigge máŋggagielat birrasis, gos sii gullet eambbo go dušše ovtta giela. Máŋggagielat mánná/olmmoš lea dakkár, gii máhttá, oahppá ja geavaha unnimusat guokte giela oktanis. Dát lea dábálaš dilli omd. kultuvrrain (dego sápmelaččain), gos ruovttuin hupmet eará giela go mii lea riikka váldogiella. Nu leage mus maiddái, go mun lean guovttegielat, human sihke davvisámegiela ja suomagiela. Jus guovtte- dege máŋggagielat olmmoš dárbbaša gielalaš hástalusaide veajuiduhttima, omd. hupmanterapiija, livččii dehálaš ahte son beasalii geavahit veajuiduhttimis dan giela, man son buoremusat máhttá ja hálddaša.

Dalle go koronavirus fallehii, oažžu lohkat olles máilmmi, ja bákkus fertiimet buohkat báhcit ruovttuide bargat ja smiehttat ođđá vugiid deaivvadit ja doallat oktavuođa, čoahkkimiid, skuvlejumiid jna., šattaimetge oahpahallat atnit gáiddusoktavuođa iešguđetlágan oktavuođain. Dalle maiddái mii hupmanterapeavttat oahpahalaimet atnit omd. zooma ja teamsa ja fáláimet terapiija gáiddusin, go eat sáhttán deaivvadit šat fysalaččat. Korona dagahan rádjehusat lihkus nohkke maŋemus, muhto gáiddusterapiija gal bázii ja gáiddusoktavuođa ávkkástallan leage šaddan lunddolaš oassin iešguđetlágán bálvalusaid fállamis. Mot dát de oidno sámegielat hupmanterapevtta- ja sámegielat olbmo, guhte dárbbahivččii sámegielat veajuiduhttima gielalaš hástalusaide, árgabeaivvis? Gáiddusoktavuođaid geavaheapmi lea buktán goittotge muhtun sámegielatbálvalusaid buorebut buohkaid olámuddui, go omd. sámegielat hupmanterapiija lea dál vejolaš oažžut dohko gos dárbbaheaddjit leat iige bálvalusaid oažžun leat šat čadnon orrunbáikái. Jus eahpidat, heivego gáiddusterapiija dutnje dehe omd. du mánnái, nu ávžžuhan roahkkadit geahččalit; mu vásáhus goitge lea, ahte eatnasiidda dát lea hui buorre veajuiduhttinmolssaeaktu, jus muđuid hupmanterapiija ii leat du báikegottis vejolaš oba oažžutge. Gáiddusterapiija ollašuhttimii it dárbbaš go dihtora ja neahttaoktavuođa; terapevtta sáhtát ná deaivat váikko livččet juostá reaissusge, dat ii leat makkárge báikái čatnon. Sámegielat hupmanterapevttat leat ain unnán, muhto sii sáhttet gáiddusoktavuođain fállat gáiddusterapiija ja vejolašvuođa sámegielat gielalaš veajuiduhttimii miehtá Suoma.